جب تک چپ ہے چپ رہنے دے ،چھیڑ نہ اس دیوانے کو
راز کی باتیں کھل جائیں گی، طول نہ دے افسانے کو

ان کی محفل سے اٹھا تو ، گھر کا رستہ بھول گیا
مئے خانے کا ہوش کسے ہے ، آگ لگے مئے خانے کو

ہجر کی آگ میں جل کر جینا کھیل ہے ہم دیوانوں کا
جل مرنا عرفان نہیں ہے ، سمجھا دو پروانے کو

کل تک ہاتھ پکڑ کر مجھ کو میخانے جو لاتا تھا
کیا جانے کیوں توڑ رہا ہے آج وہی پیمانے کو

جام پہ جام لنڈھائے مینا خالی کر دی مستوں نے
ایک ہی گھونٹ بچا تھا بسملؔ جب آئے سمجھانے کو

نئے سال کا بجٹ

نیا بجٹ ہر سال کی مانند کہتے ہیں آ نے والا ہے
دکھ دور کرے گا لوگوں کے،حل ایسا لانے والا ہے
ہر ایک ملازم کی تنخواہ ، پندرہ فیصد بڑھ جائے گی
ساتھ ہی اس کے چیزوں کی قیمت اوپر چڑھ جائے گی
ٹیکسوں کی بھر مار سے پھر، غرباء کو لوٹا جائے گا
سر سے لے کر پاؤں تک، اوکھلی میں کوٹا جائے گا
امراء ، وزراء ، سرمایہ دار ، اور سہولت پائیں گے
ملک میں صدر ، وزیر اعظم ، خوشحالی پھیلائیں گے
بجلی کا بلب جلائیں کیسے؟ ، بل اتنا آ جاتا ہے
اس پر طرہ یہ کہ ہر دم ریٹ بڑھایا جاتا ہے
بجلی گیس کے نرخ بڑھا کر ،لوگوں کو تڑپائیں گے
پٹرول ، تیل اور ڈیزل تو یہ لوگوں پر چھڑکائیں گے
لوگ مریں گے بھوکے پیاسے، پروا پھر کس بات کی ہے
ہر دن فکر انہیں تو رہتی بس اپنی ہی ذات کی ہے
بجٹ کی ر’و سے تنخواہ میں چند سکّے جو بڑھ جائیں گے
وہ بھی ٹیکسوں کی صورت میں حاکم ہی لے جائیں گے
تنخواہ دار طبقہ بجٹ بنانے والوں کو تب روئے گا
بیٹھ کے گھر کے کونے میں وہ اشکوں سے منہ دھوئے گا

مقتول بھی ہے انسان یہاں اور قاتل بھی انسان ہے
فقط تشدّد کے اس دور میں ،سستا بس انسان ہے
تیرا پاکستان ہے یہ میرا پاکستان ہے
پیار ، محبت ، امن ، سکوں ،اتحاد کا فقدان ہے
***********************************************************************
اقبال بسملؔ
سانگھڑ۔سندھ
محترم غوری صاحب!
کہئیے کیا حال ہے؟ امید ہے بخیریت ہوں گے۔
میری طرف سے آپ کی ساری ٹیم کو بہت بہت مبارک ہو اور سلامِ محبت
قبول ہو۔ دو نظمیں ارسال کر رہا ہوں ملنے پر ضرور آگاہ کریں اور اپنی ویب
سائٹ پر جگہ دے کر مشکور فرمائیں۔ شکریہ
مسیح میں آپ کا
خیر اندیش
اقبال بسملؔ
۱۷؍ مئی ۲۰۱۰ ؁ء
***************************************************